മിലാന്: യുവേഫ ചാമ്പ്യന്സ് ലീഗ് 2025-26 സീസണില് പ്രീക്വാര്ട്ടര് ഉറപ്പിക്കുന്ന ആദ്യടീമായി ഇംഗ്ലീഷ് ക്ലബ് ആഴ്സണല് എഫ്സി.
ലീഗ് റൗണ്ടിലെ ഏഴാം മത്സരത്തില് നിലവിലെ ഫൈനലിസ്റ്റുകളായ ഇന്റര് മിലാനെ അവരുടെ തട്ടകത്തില്വച്ച് 3-1നു കീഴടക്കിയാണ് പീരങ്കിപ്പട നോക്കൗട്ടില് പ്രവേശിച്ചത്. ഇംഗ്ലീഷ് പ്രീമിയര് ലീഗ് ടേബിള് ടോപ്പര്മാരായ ഗണ്ണേഴ്സ് ചാമ്പ്യന്സ് ലീഗ് സീസണില് കളിച്ച ഏഴ് മത്സരത്തിലും ജയം നേടിയെന്നതും ശ്രദ്ധേയം.
മിലാനില് നടന്ന മത്സരത്തില് ഗബ്രിയേല് ജീസസിന്റെ (10, 31) ഇരട്ടഗോളാണ് ആഴ്സണലിന് ആധികാരിക ജയം സമ്മാനിച്ചത്. വിക്ടര് ഗ്യോകെരെസിന്റെ (84) വകയായിരുന്നു മൂന്നാം ഗോള്. 18-ാം മിനിറ്റില് പീറ്റര് സൂസിക്ക് ഇന്റര് മിലാനുവേണ്ടി ഒരു ഗോള് മടക്കി. ഗബ്രിയേല് ജീസസിന്റെ ആദ്യ ഗോളില് ആഴ്സണല് ലീഡ് എടുത്തതിനു പിന്നാലെയായിരുന്നു സൂസിക്ക് തിരിച്ചടിച്ചത്.
ലീഗ് ചാമ്പ്യന് പട്ടം
36 ടീമുകള് മത്സരിക്കുന്ന, എട്ട് മത്സരങ്ങള് വീതമുള്ള ലീഗ് റൗണ്ടില് ആഴ്സണലിന് ഒരു മത്സരംകൂടി ശേഷിക്കുന്നുണ്ട്. അടുത്ത വ്യാഴാഴ്ച പുലര്ച്ചെ കസാക്കിസ്ഥാന് ക്ലബ്ബായ കൈരാട്ടിനെതിരേയാണ് ആഴ്സണലിന്റെ അവസാന മത്സരം. അന്ന് സമനില നേടിയാല് പോയിന്റ് പട്ടികയില് ഒന്നാം സ്ഥാനക്കാരായി ഗണ്ണേഴ്സിനു ലീഗ് റൗണ്ട് പൂര്ത്തിയാക്കാം.
ചരിത്രത്തില് ആദ്യമായാണ് ആഴ്സണല് ചാമ്പ്യന്സ് ലീഗില് തുടര്ച്ചയായി ഏഴ് മത്സരങ്ങളില് ജയം നേടുന്നത്. ഇംഗ്ലീഷ് ടീമുകളില് ഏറ്റവും കൂടുതല് തുടര്ജയം മാഞ്ചസ്റ്റര് യുണൈറ്റഡ് എഫ്സിയുടെ (10) പേരിലാണ്.